ਮਾਤਾ ਲਛਮੀ ਦੇਵੀ ਦੀ ਮ੍ਰਿਤਕ ਦੇਹ ਡਾਕਟਰੀ ਖੋਜ਼ ਕਾਰਜਾਂ ਲਈ ਕੀਤੀ ਦਾਨ
ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਨਵਯੁਗ ਸਾਹਿਤ ਕਲਾ ਮੰਚ ਭੀਖੀ ਦੇ ਪ੍ਰਧਾਨ ਤੇ ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੇ ਆਗੂ ਕਹਾਣੀਕਾਰ ਭੁਪਿੰਦਰ ਫੌਜੀ,ਉਸ ਦੇ ਭਰਾ ਦਰਸ਼ਨ ਸਿੰਘ ਅਤੇ ਸਮੂਹ ਪਰਿਵਾਰ ਵੱਲੋਂ ਅਗਾਂਹਵਧੂ ਸੋਚ ਰੱਖਦਿਆਂ ਆਪਣੀ ਮਾਤਾ ਲਛਮੀ ਦੇਵੀ ਦੀ ਮ੍ਰਿਤਕ ਦੇਹ ਡਾਕਟਰੀ ਖੋਜ ਕਾਰਜਾਂ ਲਈ ਸ਼ਿਵ ਸ਼ਕਤੀ ਕਾਲਜ ਆਫ ਗਰੁੱਪ ਭੀਖੀ ਦੀ ਟੀਮ ਨੂੰ ਸੌਂਪੀ।ਇਸ ਦੌਰਾਨ ਡਾ. ਪ੍ਰਦੀਪ ਕੁਮਾਰ ਨੇ ਕਿਹਾ ਕਿ ਪਰਿਵਾਰ ਦਾ ਇਹ ਇੱਕ ਚੰਗਾ ਉਪਰਾਲਾ ਹੈ,ਸਾਡੀ ਨਵੀਂ ਪੀੜ੍ਹੀ ਦੇ ਡਾਕਟਰ ਇਸ ਮਾਤਾ ਦੇ ਮ੍ਰਿਤਕ ਸ਼ਰੀਰ ਤੋਂ ਖੋਜ਼ ਕਰਕੇ ਕੁਝ ਲਾਭਦਾਇਕ ਜਾਣਕਾਰੀਆਂ ਪ੍ਰਾਪਤ ਕਰਨਗੇ।ਤਰਕਸ਼ੀਲ ਜਿਲ੍ਹਾ ਆਗੂ ਮਾਸਟਰ ਲੱਖਾ ਸਿੰਘ ਸਹਾਰਨਾ ਨੇ ਕਿਹਾ ਇਸ ਪਰਿਵਾਰ ਵੱਲੋਂ ਸਮਾਜ ਵਿੱਚ ਨਵੀਂ ਪਿਰਤ ਪਾਈ ਹੈ, ਮ੍ਰਿਤਕ ਸ਼ਰੀਰ ਉਪਰ ਖੋਜ਼ ਕਰਕੇ ਡਾਕਟਰ ਨਵੇਂ ਤਜ਼ਰਬੇ ਕਰਦੇ ਹਨ, ਇਹ ਇੱਕ ਮਹਾਂ-ਦਾਨ ਹੈ, ਇਸ ਪਰਿਵਾਰ ਤੋਂ ਹੋਰਨਾਂ ਨੂੰ ਵੀ ਸੇਧ ਲੈ ਕੇ ਅਜਿਹੇ ਕਾਰਜਾਂ ਵਿੱਚ ਆਪਣਾ ਹਿੱਸਾ ਪਾਉਣਾ ਚਾਹੀਦਾ ਹੈ।ਕਾਮਰੇਡ ਧਰਮਪਾਲ ਨੀਟਾ ਨੇ ਕਿਹਾ ਕਿ ਜਿਸ ਤਰ੍ਹਾਂ ਪਰਿਵਾਰ ਤਰਕਸ਼ੀਲ ਅਗਾਂਹਵਧੂ ਸੋਚ ਰੱਖਦਾ ਹੈ, ਉਸ ਤਰ੍ਹਾਂ ਦਾ ਹੀ ਕੰਮ ਵੀ ਕੀਤਾ ਹੈ, ਜਿਸ ਨਾਲ ਲੋਕਾਂ ਵਿੱਚ ਜਾਗਰੁਕਤਾ ਆਵੇਗੀ।ਮਾਤਾ ਲਛਮੀ ਦੇਵੀ ਦੀ , ਮ੍ਰਿਤਕ ਦੇਹ ਨੂੰ ਐਂਬੂਲੈਂਸ ਵਿੱਚ ਰੱਖ ਕੇ ਘਰ ਤੋਂ ਬੱਸ ਅੱਡੇ ਦੇ ਬਰਨਾਲਾ ਚੌਂਕ ਤੱਕ ਨਾਹਰਿਆਂ ਦੀ ਗੂੰਜ ਨਾਲ ਵਿਦਾਇਗੀ ਦਿੱਤੀ ਗਈ।ਇਸ ਮੌਕੇ ਸ਼ਾਇਰ ਸਤਪਾਲ ਭੀਖੀ,ਹਰਭਗਵਾਨ ਭੀਖੀ,ਕਰਨ ਭੀਖੀ,ਭੋਲਾ ਮੱਤੀ,ਅਵਤਾਰ ਡਿਜ਼ੀਟਲ, ਸੁਖਵਿੰਦਰ ਬੀਰ ਖੁਰਦ,ਕਹਾਣੀਕਾਰ ਅਗਾਜ਼ਬੀਰ, ਲੈਕਚਰਾਰ ਰਜਿੰਦਰ ਸਿੰਘ ਬੁਢਲਾਡਾ,ਜਸਪਾਲ ਅਤਲਾ, ਦਰਸ਼ਨ ਟੇਲਰ,ਬਲਕਾਰ ਅਤਲਾ ਤੋਂ ਇਲਾਵਾ ਤਰਕਸ਼ੀਲ ਸੁਸਾਇਟੀ ਦੇ ਸਮੂਹ ਅਹੁਦੇਦਾਰ ਹਾਜ਼ਰ ਸਨ।
