ਨਵੀਂ ਸੋਚ,ਨਵਾਂ ਅੰਦਾਜ਼ ਮਾਨਸਾ ਦੇ ਬੱਚਿਆਂ ਨੇ ਆਰਆਰਏ ਜ਼ਿਲ੍ਹਾ ਡਰਾਮਾ ਸਾਇੰਸ ਪ੍ਰਤੀਯੋਗਿਤਾ ਵਿੱਚ ਦਿਖਾਇਆ ਕਲਾ ਅਤੇ ਗਿਆਨ ਦਾ ਜਾਦੂ
ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਜਿਲ੍ਹਾ ਸਿੱਖਿਆ ਅਫਸਰ ਮਾਨਸਾ (ਸੈ. ਸਿ) ਨੀਲਮ ਰਾਣੀ ਅਤੇ ਉਪ ਜ਼ਿਲ੍ਹਾ ਸਿੱਖਿਆ ਅਫਸਰ ਮਾਨਸਾ (ਸੈ. ਸਿ) ਡਾ. ਪਰਮਜੀਤ ਸਿੰਘ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਅਤੇ ਬਲਾਕ ਨੋਡਲ ਅਫਸਰ ਮਾਨਸਾ ਕੁਲਦੀਪ ਸਿੰਘ ਦੀ ਅਗਵਾਈ ਹੇਠ ਸਕੂਲ ਆਫ ਐਮੀਨੈਂਸ ਮਾਨਸਾ ਵਿਖੇ ਜ਼ਿਲ੍ਹਾ ਪੱਧਰੀ ਸਾਇੰਸ ਡਰਾਮਾ ਪ੍ਰਤਿਯੋਗਿਤਾ ਕਰਵਾਈ।ਇਸ ਸਾਇੰਸ ਪ੍ਰਦਰਸ਼ਨੀ ਦਾ ਮੁੱਖ ਥੀਮ "ਸਾਇੰਸ ਐਂਡ ਟੈਕਨੋਲੋਜੀ ਫਾਰ ਦਾ ਬੈਨੀਫਿਟ ਆਫ ਮੈਨਕਾਇੰਡ" ਸੀ, ਜਿਸ ਵਿੱਚ ਪੰਜ ਸਭ ਥੀਮ ਸਨ- ਵਿਗਿਆਨ ਦੇ ਖੇਤਰ ਵਿੱਚ ਮਹਿਲਾਵਾਂ,ਆਧੁਨਿਕ ਖੇਤੀ, ਡਿਜਟਲ ਇੰਡੀਆ, ਸਾਰਿਆਂ ਲਈ ਸਵੱਛਤਾ ਅਤੇ ਹਰੀ ਟੈਕਨੋਲੋਜੀ ਸਨ। ਇਹਨਾਂ ਥੀਮਾ ਦੇ ਆਧਾਰ ਤੇ ਬੱਚਿਆਂ ਨੇ ਸਾਇੰਸ ਦੇ ਪੱਖ ਨੂੰ ਮੁੱਖ ਰੱਖ ਕੇ ਡਰਾਮੇ ਦੀ ਤਿਆਰੀ ਕੀਤੀ। ਡਰਾਮਾ ਪ੍ਰਤੀਯੋਗਿਤਾ ਦੇ ਸੰਚਾਲਨ ਲਈ ਸਕੂਲ ਆਫ ਐਮੀਨੈਂਸ ਦੇ ਪਿੰਸੀਪਲ ਵਿਜੈ ਮਿਡਾ ਨੇ ਪ੍ਰਤਿਯੋਗਿਤਾ ਦੇ ਪ੍ਰਬੰਧ ਲਈ ਪੂਰਾ ਸਹਿਯੋਗ ਦਿੱਤਾ। ਇਸ ਮੁਕਾਬਲੇ ਵਿੱਚ ਜਜਮੈਂਟ ਦੀ ਭੂਮਿਕਾ ਡਾ. ਜਸਬੀਰ ਸਿੰਘ ਲੈਕਚਰਾਰ ਬੁਢਲਾਡਾ,ਜਗਤਾਰ ਸਿੰਘ ਗਾਗੋਵਾਲ ਤੇ ਹਰਪ੍ਰੀਤ ਸਿੰਘ ਮੂਸਾ ਵੱਲੋਂ ਨਿਭਾਈ ਗਈ । ਇਸ ਪ੍ਰਦਰਸ਼ਨੀ ਵਿੱਚ ਬਲਾਕ ਪੱਧਰ 'ਤੇ ਹੋਈ ਡਰਾਮਾ ਪ੍ਰਤਿਯੋਗਿਤਾ ਵਿੱਚੋਂ ਪ੍ਰਤੀ ਬਲਾਕ ਪਹਿਲੀ ਅਤੇ ਦੂਜੀ ਪੁਜੀਸ਼ਨ ਹਾਸਲ ਕਰਨ ਵਾਲੀਆਂ ਟੀਮਾਂ ਨੇ ਭਾਗ ਲਿਆ। ਕੁੱਲ 10 ਟੀਮਾਂ ਵਿੱਚ 70 ਬੱਚੇ ਅਤੇ ਉਹਨਾਂ ਦੇ ਨਾਲ 20 ਗਾਈਡ ਅਧਿਆਪਕ/ਡਾਇਰੈਕਟਰ/ਸਕ੍ਰਿਪਟ ਲੇਖਕ ਮਜੂਦ ਸਨ । ਜ਼ਿਲ੍ਹਾ ਪੱਧਰੀ ਸਾਇੰਸ ਡਰਾਮਾ ਪ੍ਰਤਿਯੋਗਿਤਾ ਵਿੱਚ ਪਹਿਲਾ ਸਥਾਨ ਸ.ਸ.ਸ. ਗੰਢੂ ਕਲਾਂ , ਦੂਜਾ ਸਥਾਨ ਸ.ਸ.ਸ. (ਮਾਡਲ) ਮੀਆਂ ਅਤੇ ਤੀਜਾ ਸਥਾਨ ਸ.ਸ.ਸ. ਕੋਟੜਾ ਕਲਾਂ ਨੇ ਪ੍ਰਾਪਤ ਕੀਤਾ। ਪਹਿਲੇ ਸਥਾਨ 'ਤੇ ਰਹਿਣ ਵਾਲੀ ਡਰਾਮਾ ਟੀਮ (ਸ.ਸ.ਸ. ਗੰਢੂ ਕਲਾਂ ) ਰਾਜ ਪੱਧਰੀ ਡਰਾਮਾ ਪ੍ਰਤੀਯੋਗਿਤਾ ਵਿੱਚ ਭਾਗ ਲਵੇਗੀ । ਪਹਿਲੇ, ਦੂਜੇ ਅਤੇ ਤੀਜੇ ਸਥਾਨ 'ਤੇ ਰਹਿਣ ਵਾਲੀਆਂ ਟੀਮਾਂ ਨੂੰ ਟਰਾਫੀ ਕੱਪ ਅਤੇ ਇਨਾਮੀ ਰਾਸ਼ੀ ਵਜੋਂ 3100, 2100 ਅਤੇ 1100 ਰੁਪਏ ਦਿੱਤੇ ਗਏ। ਸਾਰੇ ਬੱਚਿਆਂ ਦੀ ਐਕਟਿੰਗ ਨੂੰ ਦੇਖਦੇ ਹੋਏ ਬੇਹਤਰੀਨ ਐਕਟਿੰਗ ਕਰਨ ਵਾਲੇ ਬੱਚੇ ਗੁਰਸ਼ਰਨ ਕੌਰ (ਸ.ਸ.ਸ. ਮੀਆਂ) ਅਤੇ ਸੁਮਨ (ਸ.ਸ.ਸ. ਰਾਏਪੁਰ) ਨੂੰ ਟਰਾਫੀ ਨਾਲ ਸਨਮਾਨਿਤ ਕੀਤਾ ਗਿਆ। ਇਸ ਪ੍ਰਤਿਯੋਗਿਤਾ ਵਿੱਚ ਸਾਰੇ ਹੀ ਭਾਗ ਲੈਣ ਵਾਲੇ ਬੱਚੇ ਅਤੇ ਅਧਿਆਪਕਾਂ ਨੂੰ ਸਰਟੀਫਿਕੇਟ ਨਾਲ ਨਿਵਾਜਿਆ ਗਿਆ।ਜ਼ਿਲ੍ਹਾ ਪੱਧਰੀ ਸਾਇੰਸ ਡਰਾਮਾ ਪ੍ਰਤੀਯੋਗਿਤਾ ਵਿੱਚ ਮੁੱਖ ਮਹਿਮਾਨ ਵਜੋਂ ਨੀਲਮ ਰਾਣੀ ਡੀਈਓ ਮਾਨਸਾ, ਡਾ. ਪਰਮਜੀਤ ਸਿੰਘ ਡਿਪਟੀ ਡੀਈਓ ਮਾਨਸਾ) ਪ੍ਰਿੰਸੀਪਲ ਕੁਲਦੀਪ ਸਿੰਘ ਫਫੜੇ ਭਾਈਕੇ, ਪ੍ਰਿੰਸੀਪਲ ਵਿਜੈ ਮਿਡਾ,ਹੈਡ ਮਾਸਟਰ ਮਨਦੀਪ ਸਿੰਘ,ਹੈਡਮਾਸਟਰ ਹਰਜਿੰਦਰ ਸਿੰਘ, ਹਰਪ੍ਰੀਤ ਸਿੰਘ ਡੀ.ਐਸ.ਐਮ. ਮਾਨਸਾ,ਨਵਨੀਤ ਕੱਕੜ ਡੀ.ਆਰ.ਸੀ. ਮਾਨਸਾ ਮੌਜੂਦ ਰਹੇ।ਡੀਈਓ ਨੀਲਮ ਰਾਣੀ ਨੇ ਕਿਹਾ ਕਿ “ਡਰਾਮਾ ਕੇਵਲ ਮਨੋਰੰਜਨ ਦਾ ਸਾਧਨ ਨਹੀਂ ਹੈ ਬਲਕਿ ਇਹ ਸਿੱਖਣ ਦਾ ਅਤੇ ਲੋਕਾਂ ਤੱਕ ਆਪਣਾ ਸੰਦੇਸ਼ ਪਹੁੰਚਾਉਣ ਦਾ ਇੱਕ ਬਹੁਤ ਹੀ ਪ੍ਰਭਾਵਸ਼ਾਲੀ ਢੰਗ ਹੈ। ਡਰਾਮਾ ਬੱਚਿਆਂ ਵਿੱਚ ਟੀਮ ਵਰਕ ਸਹਿਯੋਗ ਅਤੇ ਸਾਂਝੀ ਜਿੰਮੇਦਾਰੀ ਦੀ ਮਹੱਤਤਾ ਸਿਖਾਉਂਦਾ ਹੈ। ਮੰਚ ਉੱਤੇ ਹੋਣ ਨਾਲ ਬੱਚਿਆਂ ਵਿੱਚ ਡਰ ਘਟਦਾ ਹੈ ਅਤੇ ਉਹਨਾਂ ਵਿੱਚ ਆਤਮ ਵਿਸ਼ਵਾਸ ਪੈਦਾ ਹੁੰਦਾ ਹੈ।" ਡਾ. ਪਰਮਜੀਤ ਸਿੰਘ ਨੇ ਕਿਹਾ ਕਿ “ਸਿੱਖਿਆ ਵਿੱਚ ਨਾਟਕ ਇੱਕ ਐਸਾ ਸਾਧਨ ਹੈ ਜੋ ਮਨ, ਦਿਲ ਅਤੇ ਆਤਮਾ ਨੂੰ ਇਕੱਠਾ ਕਰਕੇ ਵਿਦਿਆਰਥੀਆਂ ਨੂੰ ਸਿਰਫ ਗਿਆਨ ਨਹੀਂ, ਜੀਵਨ ਦੀ ਸਮਝ ਵੀ ਦਿੰਦਾ ਹੈ । ਡਰਾਮੇ ਰਾਹੀਂ ਬੱਚੇ ਆਪਣੇ ਵਿਚਾਰ, ਭਾਵਨਾਵਾਂ ਅਤੇ ਅੰਦਰੂਨੀ ਸੰਘਰਸ਼ ਨੂੰ ਸੁਰੱਖਿਤ ਢੰਗ ਨਾਲ ਪ੍ਰਗਟ ਕਰ ਸਕਦੇ ਹਨ।“ ਇਸ ਮੌਕੇ ਆਰ.ਏ.ਏ ਸਾਇੰਸ ਕੋਆਰਡੀਨੇਟਰ ਇੰਦਰਪਾਲ ਸਿੰਘ ਨੇ ਸਾਰੇ ਭਾਗੀਦਾਰ ਵਿਦਿਆਰਥੀਆਂ ਅਤੇ ਉਹਨਾਂ ਦੇ ਗਾਈਡ ਅਧਿਆਪਕਾਂ ਨੂੰ ਹੌਸਲਾ ਅਫਜਾਈ ਕਰਦਿਆਂ ਕਿਹਾ ਕਿ ਜਿੱਤ ਹਾਰ ਤੋਂ ਵੱਧ ਮਹੱਤਵਪੂਰਨ ਗੱਲ ਅਨੁਭਵ ਦੀ ਹੁੰਦੀ ਹੈ ਜੋ ਕਿ ਵੱਖ-ਵੱਖ ਮੁਕਾਬਲਿਆਂ ਵਿੱਚ ਭਾਗ ਲੈ ਕੇ ਮਿਲਦਾ ਹੈ। ਅਸੀਂ ਅਕਸਰ ਵਿਗਿਆਨ ਨੂੰ ਲੈਬੋਟਰੀ ਜਾਂ ਕਲਾਸ ਰੂਮ ਤੱਕ ਸੀਮਤ ਸਮਝਦੇ ਹਾਂ ਪਰ ਅੱਜ ਦੇ ਨਾਟਕ ਸਾਨੂੰ ਦਿਖਾਉਂਦੇ ਹਨ ਕਿ ਵਿਗਿਆਨ ਸਮਾਜਿਕ ਬਦਲਾਅ,ਚੇਤਨਾ ਅਤੇ ਸਹਿਯੋਗ ਦਾ ਸਾਧਨ ਵੀ ਹੋ ਸਕਦਾ ਹੈ।ਮੁੱਖ ਮਹਿਮਾਨਾਂ ਨੇ ਬੱਚਿਆਂ ਨੂੰ ਉਤਸ਼ਾਹਿਤ ਕਰਦਿਆਂ ਵਿਗਿਆਨ ਦੀ ਮਹੱਤਤਾ ਨੂੰ ਰੋਸ਼ਨ ਕੀਤਾ। ਉਨ੍ਹਾਂ ਨੇ ਸਮਝਾਇਆ ਕਿ ਵਿਦਿਆਰਥੀ ਕਿਵੇਂ ਨਾਟਕ ਰੂਪ ਵਿੱਚ ਪਾਠਾਂ ਨੂੰ ਜੀਉਂਦੇ ਹੋਏ ਸਿੱਖ ਸਕਦੇ ਹਨ-ਜਿਸ ਨਾਲ ਸਿੱਖਣ ਦੀ ਪ੍ਰਕਿਰਿਆ ਨਾ ਸਿਰਫ਼ ਮਨੋਰੰਜਕ ਬਣਦੀ ਹੈ, ਸਗੋਂ ਜੀਵਨ ਨਾਲ ਜੋੜੀ ਹੋਈ ਵੀ। ਵਿਗਿਆਨ, ਗਣਿਤ, ਸਮਾਜਿਕ ਵਿਸ਼ੇ ਜਾਂ ਭਾਸ਼ਾਵਾਂ-ਹਰ ਵਿਸ਼ੇ ਨੂੰ ਨਾਟਕ ਦੇ ਰੂਪ ਵਿੱਚ ਪੇਸ਼ ਕਰਕੇ ਬੱਚੇ ਨਾ ਸਿਰਫ਼ ਸਮਝ ਸਕਦੇ ਹਨ, ਸਗੋਂ ਸਮਾਜ ਵਿੱਚ ਆਪਣੀ ਭੂਮਿਕਾ ਨੂੰ ਵੀ ਨਿਖਾਰ ਸਕਦੇ ਹਨ।ਜ਼ਿਲ੍ਹਾ ਪੱਧਰੀ ਸਾਇੰਸ ਡਰਾਮਾ ਪ੍ਰਤਿਯੋਗਿਤਾ ਨੂੰ ਸਫਲ ਬਣਾਉਣ ਵਿੱਚ ਪ੍ਰਬੰਧਕੀ ਟੀਮ,ਸਟੇਜ ਡੈਕੋਰੇਸ਼ਨ ਟੀਮ ਅਤੇ ਰਜਿਸਟਰੇਸ਼ਨ ਟੀਮ ਨੇ ਅਹਿਮ ਭੂਮਿਕਾ ਨਿਭਾਈ।ਡਰਾਮਾ ਪ੍ਰਤਿਯੋਗਿਤਾ ਲਈ ਸਾਰਾ ਪ੍ਰਬੰਧ ਵਿਜੈ ਕੁਮਾਰ (ਸਾਇੰਸ ਮਾਸਟਰ ਸ. ਮਿ.ਸ. ਅਲੀਸ਼ੇਰ ਖੁਰਦ), ਸੋਨੀ ਸਿੰਗਲਾ (ਬਲਾਕ ਰਿਸੋਰਸ ਕੋਆਰਡੀਨੇਟਰ ਮਾਨਸਾ), ਗੁਰਪ੍ਰੀਤ ਸਿੰਘ (ਸਾਇੰਸ ਮਾਸਟਰ ਸ.ਸ.ਸ. (ਮੁੰਡੇ) ਖਿਆਲਾਂ ਕਲਾਂ) ਅਤੇ ਜਸਕੀਰਤ ਸਿੰਘ (ਸਾਇੰਸ ਮਾਸਟਰ ਸ.ਮ.ਸ. ਮੱਲ ਸਿੰਘ ਵਾਲਾ) ਵੱਲੋਂ ਕੀਤਾ ਗਿਆ। ਵਿਜੈ ਕੁਮਾਰ ਵੱਲੋਂ ਸਟੇਜ ਸਕੱਤਰ ਦੀ ਭੂਮਿਕਾ ਨਿਭਾਈ ਅਤੇ ਸੋਨੀ ਸਿੰਗਲਾ ਨੇ ਵਿਦਿਆਰਥੀ ਜੀਵਨ ਦੇ ਤਜਰਬੇ ਸਾਂਝੇ ਕੀਤੇ ਅਤੇ ਬੱਚਿਆਂ ਦੀ ਹੌਸਲਾ ਅਫਜਾਈ ਕੀਤੀ।ਸਟੇਜ ਅਤੇ ਆਡੀਟੋਰੀਅਮ ਦੀ ਸਾਰੀ ਸਜਾਵਟ ਗਗਨਦੀਪ ਕੌਰ ਅਧਿਆਪਿਕਾ ਸਕੂਲ ਆਫ ਐਮੀਨੈਂਸ ਮਾਨਸਾ ਵੱਲੋਂ ਕੀਤੀ ਗਈ। ਮੀਡੀਆ ਅਤੇ ਰਜਿਸਟਰੇਸ਼ਨ ਦੀ ਸਾਰੀ ਜਿੰਮੇਵਾਰੀ ਰੇਨੂ ਮਹਿਤਾ ਵਿਗਿਆਨ ਅਧਿਆਪਿਕਾ ਬਰਨਾਲਾ ਨੇ ਨਿਭਾਈ।
