ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖੁਰਦ : ਜਸਵਿੰਦਰ ਸਿੰਘ ਜਨਕ ਨੇ ਸ਼ਾਟ ਪੁੱਟ 'ਚ ਮਾਨਸਾ ਜ਼ਿਲ੍ਹੇ 'ਚੋਂ ਦੂਜਾ ਸਥਾਨ ਪ੍ਰਾਪਤ ਕਰਕੇ ਸਟੇਟ ਪੱਧਰ 'ਤੇ ਖੇਡਣ ਲਈ ਕੀਤਾ ਕੁਆਲੀਫਾਈ

ਜਸਵਿੰਦਰ ਸਿੰਘ ਜਨਕ ਨੇ ਸ਼ਾਟ ਪੁੱਟ 'ਚ ਮਾਨਸਾ ਜ਼ਿਲ੍ਹੇ 'ਚੋਂ ਦੂਜਾ ਸਥਾਨ ਪ੍ਰਾਪਤ ਕਰਕੇ ਸਟੇਟ ਪੱਧਰ 'ਤੇ ਖੇਡਣ ਲਈ ਕੀਤਾ ਕੁਆਲੀਫਾਈ

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖੁਰਦ : ਜ਼ਿਲ੍ਹਾ ਪੱਧਰੀ ਖੇਡਾਂ ਵਤਨ ਪੰਜਾਬ ਦੀਆਂ ਵਿੱਚ ਸਰਕਾਰੀ ਪ੍ਰਾਇਮਰੀ ਸਮਾਰਟ ਸਕੂਲ ਰੰਘੜਿਆਲ ਦੇ ਮਿਹਨਤੀ ਅਤੇ ਖੇਡਾਂ ਨੂੰ ਅਥਾਹ ਪਿਆਰ ਕਰਨ ਵਾਲੇ ਅਤੇ ਆਪਣੇ ਰੰਘੜਿਆਲ ਸਕੂਲ ਦੇ ਅਨੇਕਾਂ ਬੱਚਿਆਂ ਨੂੰ ਵੱਖ-ਵੱਖ ਖੇਡਾਂ ਵਿੱਚ ਤਿਆਰ ਕਰਕੇ ਸਟੇਟ ਪੱਧਰ ਦੇ ਚੈਪੀਅਨ ਖਿਡਾਰੀ ਬਣਾਉਣ ਵਾਲੇ ਅਧਿਆਪਕ ਜਸਵਿੰਦਰ ਸਿੰਘ ਜਨਕ ਨੇ ਉਮਰ 51 ਤੋਂ 60 ਸ਼ਾਟ ਪੁੱਟ 'ਚ ਮਾਨਸਾ ਜ਼ਿਲ੍ਹੇ 'ਚੋਂ ਦੂਜਾ ਸਥਾਨ ਪ੍ਰਾਪਤ ਕਰਕੇ ਸਟੇਟ ਪੱਧਰ 'ਤੇ ਖੇਡਣ ਲਈ ਕੁਆਲੀਫਾਈ ਕੀਤਾ ਹੈ ਅਤੇ ਲੌਗ ਜੰਪ ਵਿੱਚ ਤੀਜਾ ਸਥਾਨ ਪ੍ਰਾਪਤ ਕੀਤਾ।ਰੰਘੜਿਆਲ ਸਕੂਲ ਦੇ ਮੁੱਖ ਅਧਿਆਪਕ ਗੁਰਸੇਵ ਸਿੰਘ ਗਾਮੀਵਾਲਾ ਅਤੇ ਸਕੂਲ ਦੇ ਅਧਿਆਪਕ ਨਾਜ਼ਰ ਸਿੰਘ ਬੱਛੋਆਣਾ ਨੇ ਦੱਸਿਆ ਕਿ ਜਸਵਿੰਦਰ ਸਿੰਘ ਉਹਨਾਂ ਦੇ ਸਕੂਲ ਦੇ ਬਹੁਤ ਹੀ ਕਾਬਿਲ ਅਧਿਆਪਕ ਹਨ,ਜੋ ਸਿੱਖਿਆ ਵਿਭਾਗ ਦੀਆਂ ਸਾਰੀਆਂ ਹੀ ਗਤੀਵਿਧੀਆਂ ਸਹਿ ਵਿੱਦਿਅਕ ਮੁਕਾਬਲੇ ਜਿਵੇਂ ਖੇਡਾਂ, ਪੇਟਿੰਗ,ਕੁਇਜ਼ ਆਦਿ ਵਿੱਚ ਸਟੇਟ ਪੱਧਰੀ ਬੱਚੇ ਤਿਆਰ ਕਰ ਚੁੱਕੇ ਹਨ। ਉਹਨਾਂ ਦਾ ਸਕੂਲ 'ਚ 150 ਪੌਦਿਆਂ ਦਾ ਜੰਗਲ ਲਗਾਉਣ ਵਿੱਚ ਬਹੁਤ ਵੱਡਾ ਯੋਗਦਾਨ ਹੈ। ਉਹ ਸਕੂਲ ਵਿੱਚ ਹਰ ਸਾਲ ਸੈਂਕੜੇ ਪੌਦੇ ਲਗਾਉਂਦੇ ਹਨ।ਉਨ੍ਹਾਂ ਦੱਸਿਆ ਕਿ ਜਸਵਿੰਦਰ ਸਿੰਘ ਜਨਕ ਨੇਕੀ ਫਾਉਂਡੇਸ਼ਨ ਬੁਢਲਾਡਾ ਦੇ ਵੀ ਸਰਗਰਮ ਮੈਂਬਰ ਹਨ ਜਿਸ ਦਾ ਸਮਾਜ ਸੇਵਾ ਦੇ ਖੇਤਰ ਵਿੱਚ ਪੰਜਾਬ ਪੱਧਰ 'ਤੇ ਬਹੁਤ ਵੱਡਾ ਨਾਂ ਹੈ।ਦਿਆਲਪੁਰਾ ਕਲੱਸਟਰ ਦੇ ਸੀਐਚਟੀ ਕੁਲਵਿੰਦਰ ਸਿੰਘ ਬੁਢਲਾਡਾ ਨੇ ਦੱਸਿਆ ਕਿ ਜਸਵਿੰਦਰ ਸਿੰਘ ਜਨਕ ਕਲੱਸਟਰ ਦਿਆਲਪੁਰਾ ਦੇ ਹੋਣਹਾਰ ਅਧਿਆਪਕਾਂ 'ਚੋਂ ਇੱਕ ਹਨ।ਜੋ ਹਰ ਸਾਲ ਪ੍ਰਾਇਮਰੀ ਸਕੂਲ ਖੇਡਾਂ ਵਿੱਚ ਮਾਨਸਾ ਜ਼ਿਲ੍ਹੇ ਦੇ ਕਨਵੀਨਰ ਬਣ ਕੇ ਰਾਜ ਪੱਧਰੀ ਖੇਡਾਂ 'ਚ ਬੱਚੇ ਲੈ ਕੇ ਜਾਂਦੇ ਹਨ।ਉਹਨਾਂ ਦੱਸਿਆ ਕਿ ਉਹ ਇਕੱਲੇ ਆਪਣੇ ਸਕੂਲ ਦੇ ਬੱਚਿਆਂ ਨੂੰ ਹੀ ਨਹੀਂ ਖਿਡਾਉਂਦੇ ਸਗੋਂ ਆਪ ਵੀ ਬਹੁਤ ਵਧੀਆ ਖਿਡਾਰੀ ਹਨ ਜਿਸ ਦੀ ਤਾਜ਼ਾ ਮਿਸ਼ਾਲ ਜ਼ਿਲ੍ਹਾ ਪੱਧਰੀ ਖੇਡਾਂ ਵਤਨ ਪੰਜਾਬ ਦੀਆਂ ਵਿੱਚ ਆਪਣੇ ਉਮਰ ਵਰਗ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਜਿੱਤ ਪ੍ਰਾਪਤ ਕਰਕੇ ਦਿੱਤੀ ਹੈ। ਉਹਨਾਂ ਕਿਹਾ ਕਿ ਸਾਰੇ ਦਿਆਲਪੁਰਾ ਕਲੱਸਟਰ ਨੂੰ ਇਹਨਾਂ 'ਤੇ ਬਹੁਤ ਮਾਣ ਹੈ,ਜਿਨ੍ਹਾਂ ਨੇ ਕਲੱਸਟਰ ਦਿਆਲਪੁਰਾ ਦਾ ਨਾਂ ਪੰਜਾਬ ਪੱਧਰ 'ਤੇ ਰੌਸ਼ਨ ਕੀਤਾ ਹੈ।ਸਮੂਹ ਕਲੱਸਟਰ ਦੇ ਅਧਿਆਪਕਾਂ ਨੇ ਜਸਵਿੰਦਰ ਸਿੰਘ ਨੂੰ ਸਟੇਟ ਪੱਧਰੀ ਖੇਡਾਂ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ।

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਸੈਂਟਰ ਬੋਹਾ ਦੀਆਂ ਕਲੱਸਟਰ ਪੱਧਰੀ ਪ੍ਰਾਇਮਰੀ ਖੇਡਾਂ ਨੇਪਰੇ ਚੜ੍ਹੀਆਂ

ਸੈਂਟਰ ਬੋਹਾ ਦੀਆਂ ਕਲੱਸਟਰ ਪੱਧਰੀ ਪ੍ਰਾਇਮਰੀ ਖੇਡਾਂ ਨੇਪਰੇ ਚੜ੍ਹੀਆਂ

ਬਾਜੀਗਰ ਬਸਤੀ ਬੋਹਾ ਦੇ ਖਿਡਾਰੀਆਂ ਨੇ ਲਗਾਤਾਰ ਤੀਜੇ ਸਾਲ ਵੀ ਜਿੱਤੀ ਆਲ ਓਵਰ ਟਰਾਫੀ

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਸਕੂਲ ਸਿੱਖਿਆ ਵਿਭਾਗ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਸੈਂਟਰ ਹੈਡ ਟੀਚਰ ਹਰਫੂਲ ਸਿੰਘ ਦੀ ਅਗਵਾਈ ਵਿੱਚ ਸਫਲਤਾ ਪੂਰਵ ਸਪੰਨ ਹੋਏ। ਜਾਣਕਾਰੀ ਦਿੰਦਿਆਂ ਮੀਡੀਆ ਇੰਚਾਰਜ ਪ੍ਰੀਤਮ ਸਿੰਘ ਮਲ ਸਿੰਘ ਵਾਲਾ ਵਾਲਿਆਂ ਨੇ ਦੱਸਿਆ ਕਿ ਸੈਂਟਰ ਪੱਧਰੀ ਖੇਡ ਮੁਕਾਬਲਿਆਂ ਵਿੱਚ ਛੇ ਸਰਕਾਰੀ ਅਤੇ ਦੋ ਨਿੱਜੀ ਸਕੂਲਾਂ ਦੇ ਸੈਂਕੜੇ ਬੱਚਿਆਂ ਨੇ ਭਾਗ ਲੈਂਦਿਆਂ ਆਪਣੇ ਆਪਣੇ ਸਕੂਲਾਂ ਲਈ ਬਹੁਤ ਸਾਰੇ ਤਗ਼ਮੇ ਪ੍ਰਾਪਤ ਕੀਤੇ। ਉਹਨਾਂ ਦੱਸਿਆ ਕਿ ਇਨਾ ਖੇਡ ਮੁਕਾਬਲਿਆਂ ਵਿੱਚ ਖੋ-ਖੋ ਲੜਕੇ ਅਤੇ ਲੜਕੀਆਂ ਪਹਿਲਾ ਸਥਾਨ ਬਾਜੀਗਰ ਬਸਤੀ ਬੋਹਾ ਅਤੇ ਦੂਜਾ ਸਥਾਨ ਮਘਾਣੀਆ ਸਕੂਲ,ਕਬੱਡੀ ਨੈਸ਼ਨਲ ਲੜਕੇ ਪਹਿਲਾ ਸਥਾਨ ਸੇਰਖਾ ਵਾਲਾ ਅਤੇ ਦੂਜਾ ਸਥਾਨ ਬਾਜ਼ੀਗਰ ਬਸਤੀ ਬੋਹਾ, ਕਬੱਡੀ ਸਰਕਲ ਪਹਿਲਾ ਸਥਾਨ ਗਦੜਪੱਤੀ ਬੋਹਾ ਅਤੇ ਦੂਸਰਾ ਸਥਾਨ ਆਦਰਸ਼ ਸਕੂਲ ਬੋਹਾ, ਜਿਮਨਾਸਟਿਕ ਲੜਕੇ ਤੇ ਲੜਕੀਆਂ ਪਹਿਲਾ ਸਥਾਨ ਬਾਜੀਗਰ ਬਸਤੀ ਬੋਹਾ, ਜੋਗਾ ਲੜਕੇ ਤੇ ਲੜਕੀਆਂ ਪਹਿਲਾ ਸਥਾਨ ਬਾਜੀਗਰ ਬਸਤੀ ਬੋਹਾ, ਦੂਸਰਾ ਸਥਾਨ ਲੜਕੇ ਮੰਘਾਣੀਆ ਅਤੇ ਲੜਕੀਆਂ ਆਦਰਸ਼ ਸਕੂਲ ਬੋਹਾ, ਲੜਕੀਆਂ ਕਬੱਡੀ ਨੈਸ਼ਨਲ ਪਹਿਲਾ ਸਥਾਨ ਬਾਜੀਗਰ ਬਸਤੀ ਬੋਹਾ ਦੂਸਰਾ ਸਥਾਨ ਗਾਦੜਪੱਤੀ ਬੋਹਾ, ਸਤਰੰਜ ਲੜਕੇ ਪਹਿਲਾ ਸਥਾਨ ਬਾਜੀਗਰ ਬਸਤੀ ਬੋਹਾ, ਦੂਸਰਾ ਸਥਾਨ ਬੋਹਾ ਮੁੰਡੇ ਅਤੇ ਲੜਕੀਆਂ ਪਹਿਲਾ ਸਥਾਨ ਬੋਹਾ ਮੁੰਡੇ, ਹੈਂਡਬਾਲ ਮਿੰਨੀ ਲੜਕੇ ਅਤੇ ਲੜਕੀਆਂ ਪਹਿਲਾ ਸਥਾਨ ਬਾਜੀਗਰ ਬਸਤੀ ਬੋਹਾ, ਫੁਟਬਾਲ ਲੜਕੇ ਤੇ ਲੜਕੀਆਂ ਪਹਿਲਾ ਸਥਾਨ ਗਾਦੜ ਪੱਤੀ ਬੋਹਾ ਅਤੇ ਦੂਸਰਾ ਸਥਾਨ ਦੋਵੇਂ ਬਾਜ਼ੀਗਰ ਬਸਤੀ ਬੋਹਾ, ਰੱਸਾ ਕਸੀ ਪਹਿਲਾ ਸਥਾਨ ਆਦਰਸ਼ ਬੋਹਾ ਅਤੇ ਦੂਸਰਾ ਸਥਾਨ ਬਾਜ਼ੀਗਰ ਬਸਤੀ ਬੋਹਾ, ਐਥਲਟਿਕ੍ਸ ਮੁਕਾਬਲਿਆਂ ਵਿੱਚ 100 ਮੀਟਰ ਦੌੜ ਲੜਕੇ ਗੁਰਵਿੰਦਰ ਸਿੰਘ ਬਾਜੀਗਰ ਬਸਤੀ ਬੋਹਾ ਪਹਿਲਾ, ਕੁਲਵਿੰਦਰ ਸਿੰਘ ਮਘਾਣੀਆਂ ਦੂਜਾ,ਮਾਣਕ ਸਿੰਘ ਬਾਜੀਗਰ ਬਸਤੀ ਬੋਹਾ ਤੀਜਾ ਸਥਾਨ,ਸੌ ਮੀਟਰ ਦੌੜ ਲੜਕੀਆਂ ਲਵਪ੍ਰੀਤ ਕੌਰ ਮਘਾਣੀਆ ਪਹਿਲਾ, ਦੀਪ ਕੌਰ ਬਾਜਗਰ ਬਸਤੀ ਬੋਹਾ ਦੂਜਾ,ਪਰਮਵੀਰ ਕੌਰ ਆਦਰਸ ਬੋਹਾ ਤੀਜਾ ਸਥਾਨ, 200 ਮੀਟਰ ਦੌੜ ਲੜਕੇ ਕੁਲਵਿੰਦਰ ਮੰਘਾਣੀਆਂ ਪਹਿਲਾ, ਰਾਜਵੀਰ ਸੈਦੇਵਾਲਾ ਦੂਜਾ ਗੁਰਵਿੰਦਰ ਬਾਜ਼ੀਗਰ ਬਸਤੀ ਬੋਹਾ ਤੀਜਾ ਸਥਾਨ,200 ਮੀਟਰ ਦੌੜ ਲੜਕੀਆਂ ਹੁਸਨਜੋਤ ਤੇ ਸਹਿਜ ਪ੍ਰੀਤ ਆਦਰਸ ਸਕੂਲ ਬੋਹਾ ਪਹਿਲਾ/ਦੂਜਾ, ਦੀਪ ਬਾਜੀਗਰ ਬਸਤੀ ਤੀਜਾ ਸਥਾਨ, 400 ਮੀਟਰ ਦੌੜ ਮਹਾਂਵੀਰ ਬਾਜੀਗਰ ਬਸਤੀ ਬੋਹਾ ਪਹਿਲਾ, ਬੀਰ ਸਿੰਘ ਬੋਹਾ ਮੁੰਡੇ ਦੂਸਰਾ,ਪ੍ਰਵੀਨ ਆਦਰਸ਼ ਬੋਹਾ ਤੀਜਾ ਸਥਾਨ,ਲੜਕੀਆਂ ਵੀਰਪਾਲ ਮੰਘਾਣੀਆਂ ਨੇ ਪਹਿਲਾ, ਸਹਿਜਪ੍ਰੀਤ ਆਦਰਸ ਸਕੂਲ ਦੂਸਰਾ ਅਤੇ ਸੰਜਨਾ ਸੇਰਖਾ ਨੇ ਤੀਸਰਾ ਸਥਾਨ, 600 ਮੀਟਰ ਦੌੜ ਲੜਕੇ ਸੁਖਜੋਤ ਮੰਘਾਣੀਆਂ ਪਹਿਲਾਂ,ਮਨਿੰਦਰ ਰਾਮ ਬਾਜੀਗਰ ਬਸਤੀ ਬੋਹਾ ਦੂਜਾ, ਵੰਸ਼ ਬੋਹਾ ਮੁੰਡੇ ਨੇ ਤੀਸਰਾ ਸਥਾਨ, ਲੜਕੀਆਂ ਵਿੱਚੋਂ ਲਵਪ੍ਰੀਤ ਮਘਾਣੀਆਂ ਨੇ ਪਹਿਲਾ,ਸਿਮਰਨਜੀਤ ਕੌਰ,ਮਹਿਕਦੀਪ ਕੌਰ ਬਾਜੀਗਰ ਬਸਤੀ ਬੋਹਾ ਨੇ ਦੂਸਰਾ,ਤੀਸਰਾ ਸਥਾਨ, ਲੰਬੀ ਛਾਲ ਲੜਕੇ ਮਨਿੰਦਰ ਰਾਮ ਅਤੇ ਗੁਰਵਿੰਦਰ ਸਿੰਘ ਬਾਜੀਗਰ ਬਸਤੀ ਬੋਹਾ ਨੇ ਪਹਿਲਾ ਤੇ ਦੂਸਰਾ, ਲੜਕੀਆਂ ਵਿੱਚੋਂ ਰਮਨਜੋਤ ਗਾਦੜ ਪੱਤੀ ਬੋਹਾ ਨੇ ਪਹਿਲਾ,ਵੀਰਪਾਲ ਤੇ ਸਿਮਰਨ ਮੰਘਾਣੀਆਂ ਨੇ ਦੂਜਾ ਤੇ ਤੀਜਾ ਸਥਾਨ, ਸ਼ਾਟ ਪੁੱਟ ਲੜਕੇ ਗੁਰਨੂਰ ਬਾਜੀਗਰ ਬਸਤੀ ਬੋਹਾ ਨੇ ਪਹਿਲਾ, ਤਰਨਵੀਰ ਗਾਦੜਪੱਤੀ ਬੋਹਾ ਦੂਸਰਾ, ਸਾਹਿਲ ਪ੍ਰੀਤ ਮੰਘਾਣੀਆਂ ਨੇ ਤੀਸਰਾ ਸਥਾਨ ਲੜਕੀਆਂ ਵਿੱਚੋਂ ਵਿਦਿਆ ਬਾਜ਼ੀਗਰ ਬਸਤੀ ਬੋਹਾ ਨੇ ਪਹਿਲਾ, ਦਿਲਪ੍ਰੀਤ ਗਾਦੜਪੱਤੀ ਬੋਹਾ ਦੂਸਰਾ,ਹੁਸਨ ਆਦਰਸ ਸਕੂਲ ਬੋਹਾ ਨੇ ਤੀਸਰਾ ਸਥਾਨ, ਕੁਸ਼ਤੀਆਂ 25 ਕਿਲੋਗ੍ਰਾਮ ਰਾਜਬੀਰ ਬੋਹਾ ਮੁੰਡੇ ਪਹਿਲਾ, ਅਸਮੀਤ ਬਾਜ਼ੀਗਰ ਬਸਤੀ ਬੋਹਾ ਦੂਸਰਾ 28 ਕਿਲੋਗ੍ਰਾਮ ਵਿੱਚ ਕੁਲਵਿੰਦਰ ਮੰਘਾਣੀਆਂ ਨੇ ਪਹਿਲਾ, ਮਨਜੋਤ ਬਾਜੀਗਰ ਬਸਤੀ ਬੋਹਾ ਨੇ ਦੂਸਰਾ, 30 ਕਿਲੋਗ੍ਰਾਮ ਵਰਗ ਤਰਨਵੀਰ ਗਾਦੜ ਪੱਤੀ ਬੋਹਾ ਪਹਿਲਾ, ਰਾਜਵੀਰ ਬੋਹਾ ਮੁੰਡੇ ਦੂਜਾ, ਸਾਹਿਲਪ੍ਰੀਤ ਮੰਘਾਣੀਆਂ ਪਹਿਲਾ, ਰਜਿੰਦਰ ਬਾਜੀਗਰ ਬਸਤੀ ਬੋਹਾ ਦੂਸਰਾ ਸਥਾਨ, ਇਹਨਾਂ ਸਾਰੇ ਖਿਡਾਰੀਆਂ ਨੇ ਕਰਮਵਾਰ ਆਪਣੀ ਵਧੀਆ ਖੇਡ ਦਾ ਪ੍ਰਦਰਸ਼ਨ ਕਰਦਿਆਂ ਆਪਣੇ ਕੋਚ ਅਧਿਆਪਕਾਂ ਅਤੇ ਸਕੂਲਾਂ ਦੇ ਨਾਮ ਰੋਸ਼ਨ ਕੀਤੇ ਹਨ। ਇਸ ਤੋਂ ਇਲਾਵਾ ਆਪਣੇ ਪਿਛਲੇ ਸਾਲਾਂ ਦੇ ਪ੍ਰਦਰਸ਼ਨ ਨੂੰ ਜਾਰੀ ਰੱਖਦਿਆਂ ਬਾਜੀਗਰ ਬਸਤੀ ਬੋਹਾ ਦੇ ਖਿਡਾਰੀਆਂ ਨੇ ਇਸ ਸਾਲ ਵੀ ਬਿਹਤਰ ਖੇਡ ਕਾਰਗੁਜ਼ਾਰੀ ਸਦਕਾ ਆਲ ਓਵਰ ਟਰਾਫੀ 'ਤੇ ਮੁੜ ਕਬਜ਼ਾ ਕੀਤਾ।ਜਿਸ ਲਈ ਸੈਂਟਰ ਹੈਡ ਟੀਚਰ ਹਰਫੂਲ ਸਿੰਘ ਨੇ ਵਧਾਈਆਂ ਦਿੰਦਿਆਂ ਹੋਰ ਮਿਹਨਤ ਕਰਨ ਲਈ ਵੀ ਪ੍ਰੇਰਿਤ ਕੀਤਾ।ਇਨਾ ਦੋ ਦਿਨਾਂ ਚੱਲੇ ਖੇਡ ਮੁਕਾਬਲਿਆਂ ਵਿੱਚ ਵਿਸ਼ੇਸ਼ ਮਹਿਮਾਨਾਂ ਵਜੋਂ ਸਮਾਜ ਸੇਵੀ ਕਮਲਜੀਤ ਬਾਵਾ ਬੋਹਾ,ਮਿੱਠੂ ਸਿੰਘ ਸੇਵਾਮੁਕਤ ਡੀ.ਪੀ.ਈ, ਸਮਾਜ ਸੇਵੀ ਹਰਪਾਲ ਸਿੰਘ ਪੰਮੀ ਬੋਹਾ, ਜੱਗਾ ਸਿੰਘ ਐਮਸੀ ਗਾਦੜ ਪੱਤੀ ਬੋਹਾ, ਸਮਾਜ ਸੇਵੀ ਸਾਬਕਾ ਫੌਜੀ ਕਰਮਜੀਤ ਸਿੰਘ ਬੋਹਾ ਅਤੇ ਹੋਰ ਪਤਵੰਤੇ ਬੱਚਿਆਂ ਨੂੰ ਅਸ਼ੀਰਵਾਦ ਦੇਣ ਲਈ ਵਿਸ਼ੇਸ਼ ਤੌਰ 'ਤੇ ਪਹੁੰਚੇ| ਇਹਨਾਂ ਖੇਡਾਂ ਦੇ ਬੇਹਤਰ ਸੰਚਾਲਨ ਲਈ ਨਗਰ ਪੰਚਾਇਤ ਬੋਹਾ ਬਿਹਤਰ ਸਹਿਯੋਗ ਰਿਹਾ।ਜੇਤੂ ਬੱਚਿਆਂ ਤੇ ਅਧਿਆਪਕਾਂ ਨੂੰ ਪਤਵੰਤਿਆਂ ਅਤੇ ਸੈਂਟਰ ਹੈਡ ਟੀਚਰ ਹਰਫੂਲ ਸਿੰਘ ਵੱਲੋਂ ਸਨਮਾਨਿਤ ਕੀਤਾ ਗਿਆ।ਉਨਾਂ ਇਹਨਾਂ ਖੇਡਾਂ ਨੂੰ ਸਫਲ ਬਣਾਉਣ ਲਈ ਸਹਿਯੋਗ ਕਰਨ ਵਾਲੇ ਉਹ ਮੁੱਖ ਅਧਿਆਪਕਾਂ,ਅਧਿਆਪਕਾਂ, ਮਿਡ ਡੇ ਮੀਲ ਕਾਮਿਆ ਅਤੇ ਵਿਦਿਆਰਥੀਆਂ ਦਾ ਧੰਨਵਾਦ ਕੀਤਾ।

ਦਰਸ਼ਨ ਸਿੰਘ ਚੌਹਾਨ,ਸੁਨਾਮ : 'ਆਪ' ਦੀ ਸਿੱਖ ਵਿਰੋਧੀ ਸੋਚ ਹੋਈ ਬੇਨਕਾਬ : ਪ੍ਰਿਤਪਾਲ ਸਿੰਘ ਹਾਂਡਾ

'ਆਪ' ਦੀ ਸਿੱਖ ਵਿਰੋਧੀ ਸੋਚ ਹੋਈ ਬੇਨਕਾਬ : ਪ੍ਰਿਤਪਾਲ ਸਿੰਘ ਹਾਂਡਾ

ਦਿੱਲੀ ਮੰਤਰੀ ਮੰਡਲ ਵਿੱਚ ਨਹੀਂ ਸ਼ਾਮਿਲ ਕੀਤਾ ਕੋਈ ਸਿੱਖ ਮੰਤਰੀ

ਦਰਸ਼ਨ ਸਿੰਘ ਚੌਹਾਨ,ਸੁਨਾਮ : ਸ਼੍ਰੋਮਣੀ ਅਕਾਲੀ ਦਲ ਸੁਧਾਰ ਲਹਿਰ ਦੇ ਸੀਨੀਅਰ ਆਗੂ ਅਤੇ ਮਾਰਕਿਟ ਕਮੇਟੀ ਸੁਨਾਮ ਦੇ ਸਾਬਕਾ ਚੇਅਰਮੈਨ ਜਥੇਦਾਰ ਪ੍ਰਿਤਪਾਲ ਸਿੰਘ ਹਾਂਡਾ ਨੇ ਕਿਹਾ ਕਿ ਦਿੱਲੀ ਸਰਕਾਰ ਵਿੱਚ ਕਿਸੇ ਸਿੱਖ ਨੂੰ ਮੰਤਰੀ ਨਾ ਬਣਾਕੇ ਆਮ ਆਦਮੀ ਪਾਰਟੀ ਦਾ ਸਿੱਖ ਵਿਰੋਧੀ ਚਿਹਰਾ ਬੇਨਕਾਬ ਹੋ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਅਰਵਿੰਦ ਕੇਜਰੀਵਾਲ ਤਿੰਨ ਵਾਰ ਦਿੱਲੀ ਦੇ ਮੁੱਖ ਮੰਤਰੀ ਬਣੇ ਅਤੇ ਹੁਣ ਅਸਤੀਫ਼ੇ ਤੋਂ ਬਾਅਦ ਬਣੀ ਮਹਿਲਾ ਮੁੱਖ ਮੰਤਰੀ ਆਤਿਸ਼ੀ ਮਾਨਰੇਲਾ ਮੰਤਰੀ ਮੰਡਲ ਵਿਚ ਵੀ ਕਿਸੇ ਸਿੱਖ ਚਿਹਰੇ ਨੂੰ ਮੰਤਰੀ ਨਹੀਂ ਬਣਾਇਆ ਗਿਆ। ਐਤਵਾਰ ਨੂੰ ਸੁਨਾਮ ਵਿਖੇ ਜਾਰੀ ਬਿਆਨ ਵਿੱਚ ਅਕਾਲੀ ਆਗੂ ਜਥੇਦਾਰ ਪ੍ਰਿਤਪਾਲ ਸਿੰਘ ਹਾਂਡਾ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਆਪਣੇ ਆਪ ਨੂੰ ਧਰਮ ਨਿਰਪੱਖ ਹੋਣ ਦਾ ਢੰਡੋਰਾ ਪਿੱਟ ਰਹੀ ਹੈ ਲੇਕਿਨ ਘੱਟ ਗਿਣਤੀਆਂ ਖਾਸ ਕਰਕੇ ਸਿੱਖ ਭਾਈਚਾਰੇ ਨੂੰ ਦਿੱਲੀ ਸਰਕਾਰ ਵਿੱਚ ਮੰਤਰੀ ਵਜੋਂ ਪ੍ਰਤੀਨਿਧਤਾ ਨਾ ਦੇਕੇ ਸਿੱਖ ਸੋਚ ਵਿਰੋਧੀ ਹੋਣ ਦਾ ਸਬੂਤ ਦੇ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਸਿੱਖ ਭਾਈਚਾਰੇ ਨੇ ਘੱਟ ਗਿਣਤੀ ਵਿੱਚ ਹੁੰਦਿਆਂ ਦੇਸ਼ ਦੀ ਆਜ਼ਾਦੀ ਤੋਂ ਲੈਕੇ ਮੁਲਕ ਦੇ ਹਿੱਤਾਂ ਦੀ ਰਾਖੀ ਲਈ ਮੋਹਰੀ ਹੋ ਕੇ ਲੜਾਈਆਂ ਲੜੀਆਂ ਹਨ ਲੇਕਿਨ ਬਾਵਜੂਦ ਇਸਦੇ ਅਰਵਿੰਦ ਕੇਜਰੀਵਾਲ ਅਤੇ ਉਸ ਦੀ ਜੁੰਡਲੀ ਸਿੱਖ ਭਾਈਚਾਰੇ ਨੂੰ ਅਣਡਿੱਠ ਕਰ ਰਹੀ ਹੈ। ਸਾਬਕਾ ਚੇਅਰਮੈਨ ਹਾਂਡਾ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੇ ਸੁਪਰੀਮੋ ਅਤੇ ਦਿੱਲੀ ਦੇ ਸਾਬਕਾ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੇ ਇਸ਼ਾਰੇ ਤੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੂੰ ਵੀ ਆਤਿਸ਼ੀ ਮਾਨਰੇਲਾ ਮੰਤਰੀ ਮੰਡਲ ਦੇ ਸਹੁੰ ਚੁੱਕ ਸਮਾਗਮ ਵਿੱਚੋਂ ਵੀ ਦੂਰ ਰੱਖਿਆ ਗਿਆ ਹੈ, ਅਜਿਹਾ ਵਰਤਾਰਾ ਸਿੱਖ ਵਿਰੋਧੀ ਚਿਹਰੇ ਨੂੰ ਹੋਰ ਵੀ ਬੇਨਕਾਬ ਕਰਦਾ ਦਿਖਾਈ ਦੇ ਰਿਹਾ ਹੈ। ਉਨ੍ਹਾਂ ਹਰਿਆਣਾ ਦੀ ਜਨਤਾ ਨੂੰ ਸੁਚੇਤ ਕਰਦਿਆਂ ਕਿਹਾ ਕਿ ਝੂਠ ਅਤੇ ਫਰੇਬ ਦੀ ਰਾਜਨੀਤੀ ਕਰਨ ਵਿੱਚ ਮਾਹਿਰ ਆਮ ਆਦਮੀ ਪਾਰਟੀ ਦੇ ਆਗੂਆਂ ਦੇ ਬਹਿਕਾਵੇ ਵਿੱਚ ਨਾ ਆਇਓ, ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਨੇ ਪੰਜਾਬ ਨੂੰ ਬਰਬਾਦੀ ਦੇ ਕੰਢੇ ਲਿਆ ਖੜ੍ਹਾ ਕਰ ਦਿੱਤਾ ਹੈ।

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਬੇਟੀ ਦੇ ਜਨਮ ਦਿਨ 'ਤੇ ਸਰਕਾਰੀ ਪ੍ਰਾਇਮਰੀ ਸਕੂਲ ਅਤਲਾ ਕਲਾਂ ਵਿਖੇ ਲਗਾਏ ਪੌਦੇ

ਬੇਟੀ ਦੇ ਜਨਮ ਦਿਨ 'ਤੇ  ਸਰਕਾਰੀ ਪ੍ਰਾਇਮਰੀ ਸਕੂਲ ਅਤਲਾ ਕਲਾਂ ਵਿਖੇ ਲਗਾਏ ਪੌਦੇ

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਭਾਈ ਰਾਮ ਸਿੰਘ ਗ੍ਰੰਥੀ ਸਿੰਘ ਗੁਰਦੁਆਰਾ ਸਾਹਿਬ ਅਤਲਾ ਕਲਾਂ ਵੱਲੋਂ ਆਪਣੀ ਬੇਟੀ ਜਸ਼ਨਪ੍ਰੀਤ ਕੌਰ ਦੇ ਖੇਡਾਂ ਵਤਨ ਪੰਜਾਬ ਦੀਆਂ ਵਿੱਚੋਂ ਅਥਲੈਟਿਕ ਵਿੱਚ 110 ਮੀਟਰ ਹਰਡਲ ਦੋੜ ਅਤੇ 100 ਮੀਟਰ ਦੌੜ ਪਹਿਲਾ ਸਥਾਨ ਪ੍ਰਾਪਤ ਕਰਨ ਅਤੇ ਉਸ ਦੇ ਜਨਮ ਦਿਨ ਦੀ ਖੁਸ਼ੀ ਵਿੱਚ ਸਰਕਾਰੀ ਪ੍ਰਾਇਮਰੀ ਸਕੂਲ ਅਤਲਾ ਕਲਾਂ ਵਿਖੇ ਸ਼ਾਨਦਾਰ ਅਤੇ ਕੀਮਤੀ ਪੰਜ ਬੂਟੇ ਲਗਾਏ ਗਏ ਅਤੇ ਉਹਨਾਂ ਵੱਲੋਂ ਬੂਟਿਆਂ ਦੀ ਕਾਂਟ ਛਾਂਟ ਲਈ ਸਕੂਲ ਨੂੰ ਕੈਂਚੀ ਵੀ ਭੇਂਟ ਕੀਤੀ।ਈਕੋ ਕਲੱਬ ਇੰਚਾਰਜ ਅਸ਼ਵਿੰਦਰ ਸਿੰਘ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਭਾਈ ਸਾਹਿਬ ਸਕੂਲ ਨੂੰ ਸਹਿਯੋਗ ਕਰਨ ਲਈ ਹਮੇਸ਼ਾ ਤਤਪਰ ਰਹਿੰਦੇ ਹਨ।ਸਕੂਲ ਮੁਖੀ ਬਲਜਿੰਦਰ ਸਿੰਘ ਵੱਲੋਂ ਧੰਨਵਾਦ ਕਰਦਿਆਂ ਕਿਹਾ ਇਸ ਨਾਲ਼ ਸਮਾਜ ਨੂੰ ਵੀ ਚੰਗਾ ਸੁਨੇਹਾ ਮਿਲੇਗਾ।ਜਿਸ ਤਰ੍ਹਾਂ ਸਕੂਲ ਦੇ ਬੱਚੇ ਆਪਣੇ ਜਨਮ ਦਿਨ 'ਤੇ ਸਕੂਲ ਵਿੱਚ ਰੀਤ ਮੁਤਾਬਿਕ ਇੱਕ ਬੂਟਾ ਲਾਉਂਦੇ ਹਨ ਸਾਨੂੰ ਵੀ ਵਾਤਾਵਰਨ ਦੀ ਸ਼ੁੱਧਤਾ ਲਈ ਅਤੇ ਹਰਿਆਲੀ ਵਾਸਤੇ ਖੁਸ਼ੀ ਦੇ ਮੌਕੇ ਸਾਂਝੀਆਂ ਥਾਵਾਂ ਸਕੂਲ,ਡਿਸਪੈਂਸਰੀ,ਧਰਮਸ਼ਾਲਾ,ਪਿੰਡ ਦੀ ਸੱਥ ਅਤੇ ਹੋਰ ਧਾਰਮਿਕ ਸਥਾਨਾਂ 'ਤੇ ਵੱਧ ਤੋਂ ਵੱਧ ਬੂਟੇ ਲਾਉਣੇ ਚਾਹੀਦੇ ਹਨ ਤਾਂ ਕਿ ਗੰਧਲੇ ਹੋ ਰਹੇ ਵਾਤਾਵਰਨ ਨੂੰ ਬਚਾਉਣ ਵਿੱਚ ਮਦਦ ਮਿਲ ਸਕੇ।ਇਸ ਸਮੇਂ ਅਜੈਬ ਸਿੰਘ ਖ਼ਜ਼ਾਨਚੀ,ਅਧਿਆਪਕ ਸੁਰਜੀਤ ਸਿੰਘ,ਗੁਰਦੀਪ ਸਿੰਘ,ਅਵਤਾਰ ਸਿੰਘ ਅਤੇ ਕਾਕਾ ਮਨਪ੍ਰੀਤ ਸਿੰਘ ਹਾਜ਼ਰ ਸਨ।

ਗੁਰਵਿੰਦਰ ਸਿੰਘ ਚਹਿਲ,ਚੀਮਾ ਮੰਡੀ : ਐਸ.ਏ.ਐਸ. ਇੰਟਰਨੈਸ਼ਨਲ ਸਕੂਲ ਚੀਮਾ ਦੇ ਵਿਦਿਆਰਥੀਆਂ ਨੇ ਰਾਜ ਪੱਧਰੀ ਖੇਡਾਂ 'ਚ ਜਿੱਤੇ ਤਗਮੇ

ਐਸ.ਏ.ਐਸ. ਇੰਟਰਨੈਸ਼ਨਲ ਸਕੂਲ ਚੀਮਾ ਦੇ ਵਿਦਿਆਰਥੀਆਂ ਨੇ ਰਾਜ ਪੱਧਰੀ ਖੇਡਾਂ 'ਚ ਜਿੱਤੇ ਤਗਮੇ

ਗੁਰਵਿੰਦਰ ਸਿੰਘ ਚਹਿਲ,ਚੀਮਾ ਮੰਡੀ : ਇਲਾਕੇ ਦੀ ਨਾਮਵਰ ਵਿਦਿਅਕ ਸੰਸਥਾ  ਐਸ.ਏ.ਐਸ ਇੰਟਰਨੈਸ਼ਨਲ ਸਕੂਲ ਚੀਮਾ ਦੇ ਵਿਦਿਆਰਥੀਆਂ ਨੇ ਚੱਲ ਰਹੀਆਂ ਸਕੂਲੀ ਖੇਡਾਂ ਦੇ ਰਾਜ ਪੱਧਰੀ ਖੇਡ ਮੁਕਾਬਲਿਆਂ ਵਿੱਚ ਭਾਗ ਲੈਦੇ ਹੋਏ ਜੁਡੋ ਅੰਡਰ 14 (ਲੜਕੀਆਂ) ਵਿੱਚ ਮਨਜੋਤ ਕੌਰ ਨੇ ਸੋਨ ਤਗਮਾ ਜਿੱਤਿਆ ਅਤੇ ਆਪਣੀ ਚੋਣ ਨੈਸ਼ਨਲ ਖੇਡਾਂ ਵਿੱਚ ਕਰਵਾਈ।ਕੁਸ਼ਤੀ ਵਿੱਚ ਸ਼ਰਨ ਕੌਰ ਨੇ ਤੀਜਾ ਸਥਾਨ ਹਾਸਿਲ ਕਰਕੇ ਕਾਂਸੇ ਦਾ ਤਗਮਾ ਜਿੱਤਿਆ।ਇਸੇ ਤਰ੍ਹਾਂ ਖੇਡਾਂ ਵਤਨ ਪੰਜਾਬ ਦੀਆ ਵਿੱਚ ਭਾਗ ਲੈਂਦਿਆਂ ਅਰਸ਼ਦੀਪ ਕੌਰ,ਕੁਲਦੀਪ ਕੌਰ ਅਤੇ ਸ਼ਰਨਪ੍ਰੀਤ ਕੌਰ ਨੇ ਅਪਣੇ ਵਰਗ ਵਿੱਚ ਸੋਨ ਤਗਮਾ ਅਤੇ ਸੁਖਦੀਪ ਸਿੰਘ ਨੇ ਕਾਂਸੇ ਦਾ ਤਗਮਾ ਜਿੱਤ ਕੇ ਅਪਣੇ ਸਕੂਲ ਤੇ ਅਪਣੇ ਮਾਪਿਆਂ ਦਾ ਨਾਂ ਰੌਸ਼ਨ ਕੀਤਾ।ਵਿਦਿਅਰਥੀਆ ਦੀ ਨੈਸ਼ਨਲ ਤੇ ਸਟੇਟ ਵਿੱਚ ਚੋਣ ਹੋਣ ਉਪਰੰਤ ਇਹਨਾਂ ਵਿਦਿਆਰਥੀਆ ਦਾ ਸਕੂਲ ਮਨੈਜਮੈਟ ਵੱਲੋਂ ਸਕੂਲ ਪਹੁੰਚਣ 'ਤੇ ਮੈਡਲ ਅਤੇ ਹਾਰ ਪਾ ਕੇ ਨਿੱਘਾ ਸਵਾਗਤ ਕੀਤਾ।ਸਕੂਲ ਪ੍ਰਿੰਸੀਪਲ ਵਿਕਰਮ ਸ਼ਰਮਾ  ਨੇ ਵਿਦਿਆਰਥੀਆਂ ਦੇ ਨਾਲ ਸਕੂਲ ਜੂਡੋ ਕੋਚ ਪਿਰਥੀਪਾਲ ਸਿੰਘ,ਕਬੱਡੀ ਕੋਚ ਰੁਪਿੰਦਰ ਸਿੰਘ,ਬਾਕਸਿੰਗ ਕੋਚ ਮਨਪ੍ਰੀਤ ਕੌਰ,ਸ਼ੂਟਿੰਗ ਕੋਚ ਗਗਨ ਸਿੰਘ,ਸਕੇਟਿੰਗ ਕੋਚ ਸਾਹਿਲ ਸਿੰਗਲਾ ਤੇ ਸਮੂਹ ਸਟਾਫ ਨੂੰ ਜਿੱਤ ਦੀ ਵਧਾਈ ਦਿੱਤੀ।ਇਸ ਮੌਕੇ ਉਪ ਪ੍ਰਿੰਸੀਪਲ ਬਲਵਿੰਦਰ ਸਿੰਘ,ਮੈਨੇਜਰ ਸ਼ਿਵ ਕੁਮਾਰ, ਸ਼ਸ਼ੀਕਾਂਤ ਮਿੱਤਲ,ਵਿਭਾਗ ਮੁਖੀ ਜਸਪ੍ਰੀਤ ਕੌਰ,ਹਰਭਵਨ ਕੌਰ ਅਤੇ ਸਕੂਲ ਸਟਾਫ ਹਾਜ਼ਰ ਸੀ।

ਗੁਰਵਿੰਦਰ ਸਿੰਘ ਚਹਿਲ,ਚੀਮਾ ਮੰਡੀ : ਨੈਸ਼ਨਲ ਕਾਲਜ ਭੀਖੀ ਦਾ ਬੀ.ਏ. ਬੀਐਡ ਭਾਗ ਚੌਥਾ ਦਾ ਨਤੀਜਾ ਰਿਹਾ ਸ਼ਾਨਦਾਰ

ਨੈਸ਼ਨਲ ਕਾਲਜ ਭੀਖੀ ਦਾ ਬੀ.ਏ. ਬੀਐਡ ਭਾਗ ਚੌਥਾ ਦਾ ਨਤੀਜਾ ਰਿਹਾ ਸ਼ਾਨਦਾਰ

ਗੁਰਵਿੰਦਰ ਸਿੰਘ ਚਹਿਲ,ਚੀਮਾ ਮੰਡੀ :  ਨੈਸ਼ਨਲ ਕਾਲਜ ਭੀਖੀ ਦਾ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਵੱਲੋਂ ਐਲਾਨੇ ਬੀ.ਏ.ਬੀਐਡ ਭਾਗ ਚੌਥਾ ਸਮੈਸਟਰ ਅੱਠਵਾਂ ਦਾ ਨਤੀਜਾ ਸ਼ਾਨਦਾਰ ਰਿਹਾ।ਕਾਲਜ ਪ੍ਰਿੰਸੀਪਲ ਡਾ. ਐਮ ਕੇ ਮਿਸ਼ਰਾ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਜਸਕੀਰਤ ਕੌਰ ਨੇ 82 ਫ਼ੀਸਦੀ ਅੰਕਾਂ ਨਾਲ ਪਹਿਲਾ, ਜਸਪ੍ਰੀਤ ਕੌਰ ਨੇ 81 ਫ਼ੀਸਦੀ ਅੰਕਾਂ ਨਾਲ ਦੂਜਾ ਅਤੇ ਹਰਪ੍ਰੀਤ ਕੌਰ ਤੇ ਜਗਦੀਪ ਕੌਰ  ਨੇ 80 ਫ਼ੀਸਦੀ ਅੰਕਾਂ ਨਾਲ ਤੀਜਾ ਸਥਾਨ ਹਾਸਿਲ ਕੀਤਾ।ਪ੍ਰਿੰਸੀਪਲ ਡਾ. ਐਮ.ਕੇ. ਮਿਸ਼ਰਾ ਨੇ ਕਿਹਾ ਕਿ ਹਰ ਵਾਰ ਦੀ ਤਰ੍ਹਾਂ ਯੂਨੀਵਰਸਿਟੀ ਦੇ ਨਤੀਜਿਆਂ ਵਿਚ ਕਾਲਜ ਦਾ ਨਾਂ ਮੋਹਰੀ ਕਾਲਜਾਂ ਵਿੱਚ ਆਉਂਦਾ ਹੈ।ਕਾਲਜ ਦੇ ਸਾਰੇ ਕੋਰਸਾਂ ਦੇ ਨਤੀਜੇ ਕਾਲਜ ਸਟਾਫ਼ ਦੀ ਮਿਹਨਤ ਦਾ ਨਤੀਜਾ ਹੈ।ਕਾਲਜ ਪ੍ਰਧਾਨ ਹਰਬੰਸ ਦਾਸ ਬਾਵਾ ਨੇ ਪਾਸ ਹੋਏ ਵਿਦਿਆਰਥੀਆਂ ਨੂੰ ਇਹਨਾਂ ਨਤੀਜਿਆਂ 'ਚ ਸ਼ਾਨਦਾਰ ਪ੍ਰਾਪਤੀ 'ਤੇ ਵਧਾਈ ਦਿੰਦਿਆਂ ਉੱਜਵਲ ਭਵਿੱਖ ਲਈ ਕਾਮਨਾ ਕੀਤੀ। ਇਸ ਮੌਕੇ ਪ੍ਰੋਫ਼ੈਸਰ ਗੁਰਤੇਜ ਸਿੰਘ ਤੇਜੀ,ਕਲਾਸ ਇੰਚਾਰਜ ਪ੍ਰੋਫ਼ੈਸਰ ਸੁਖਵੀਰ ਕੌਰ,ਪ੍ਰੋਫੈਸਰ ਹਰਬੰਸ ਸਿੰਘ,ਪ੍ਰੋਫ਼ੈਸਰ ਅਵਤਾਰ ਸਿੰਘ ਅਤੇ ਸਮੂਹ ਸਟਾਫ਼ ਮੌਜ਼ੂਦ ਸੀ।

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਮਾਨਸਾ ਜ਼ਿਲੵੇ 'ਚ ਉਲਾਸ ਇਮਤਿਹਾਨ ਦਾ ਸਫ਼ਲ ਸੰਚਾਲਨ

ਮਾਨਸਾ ਜ਼ਿਲੵੇ 'ਚ ਉਲਾਸ ਇਮਤਿਹਾਨ ਦਾ ਸਫ਼ਲ ਸੰਚਾਲਨ

ਗੁਰਵਿੰਦਰ ਸਿੰਘ ਚਹਿਲ,ਹੀਰੋਂ ਖ਼ੁਰਦ : ਡਾਇਰੈਕਟਰ ਐਸਸੀਈਆਰਟੀ ਅਮਨਿੰਦਰ ਕੌਰ ਬਰਾੜ ਦੇ ਦਿਸ਼ਾ ਨਿਰਦੇਸ਼ਾਂ ਹੇਠ ਸਹਾਇਕ ਡਾਇਰੈਕਟਰ ਅਤੇ ਪ੍ਰਿੰਸੀਪਲ ਡਾਇਟ ਡਾ. ਬੂਟਾ ਸਿੰਘ ਸੇਖੋਂ ਦੀ ਅਗਵਾਈ ਹੇਠ ਜ਼ਿਲੵਾ ਮਾਨਸਾ 'ਚ ਉਲਾਸ ਤਹਿਤ ਦੂਜਾ ਬੁਨਿਆਦੀ ਸਾਖਰਤਾ ਅਤੇ ਸੰਖਿਆ ਮੁਲਾਂਕਣ ਟੈਸਟ ਸਫ਼ਲਤਾਪੂਰਵਕ ਕਰਵਾਇਆ।ਡਾ. ਬੂਟਾ ਸਿੰਘ ਸੇਖੋਂ  ਨੇ ਦੱਸਿਆ ਕਿ ਮਾਨਸਾ ਜ਼ਿਲੵੇ ਵਿੱਚ 216 ਪ੍ਰੀਖਿਆ ਕੇਂਦਰ ਬਣਾਏ ਗਏ ਜਿਸ ਵਿੱਚ 10 ਹਜ਼ਾਰ ਤੋਂ ਵੱਧ ਸਿਖਿਆਰਥੀਆਂ ਨੇ ਉਲਾਸ ਪੇਪਰ ਦਿੱਤਾ।ਭੁਪਿੰਦਰ ਕੌਰ ਡੀ.ਈ.ਓ. (ਸੈ.ਸਿ.) ਮਾਨਸਾ ਨੇ ਕਿਹਾ ਕਿ ਇਸ ਪੋ੍ਜੈਕਟ ਨਾਲ਼ ਸਮਾਜ ਵਿੱਚ ਸਿੱਖਿਆ ਦਾ ਪਾਸਾਰ ਵਧੇਗਾ ਅਤੇ ਬੱਚਿਆਂ ਦੇ ਨਾਲ਼ ਮਾਪਿਆਂ ਵਿੱਚ ਸਿੱਖਿਆ ਪ੍ਰਤੀ ਹੋਰ ਚੇਤਨਤਾ ਪੈਦਾ ਹੋਵੇਗੀ।ਜ਼ਿਲੵਾ ਨੋਡਲ ਅਫ਼ਸਰ (ਨਿਲਪ) ਡਾ. ਅੰਗਰੇਜ਼ ਸਿੰਘ ਵਿਰਕ ਨੇ ਕਿਹਾ ਕਿ ਉਲਾਸ ਪੋ੍ਜੈਕਟ ਨਵ ਭਾਰਤ ਸਾਖਰਤਾ ਮਿਸ਼ਨ ਤਹਿਤ ਭਾਰਤ ਸਰਕਾਰ ਦਾ ਪੋ੍ਗਰਾਮ ਹੈ ਜਿਸਦਾ ਉਦੇਸ਼ ਦੇਸ਼ ਵਿੱਚ ਸਾਖਰਤਾ ਦਰ ਨੂੰ ਵਧਾਉਣਾ ਹੈ। ਜ਼ਿਲੵਾ ਮਾਨਸਾ ਵਿਖੇ ਉਲਾਸ 2024 ਦੇ ਸਫ਼ਲਤਾ ਪੂਰਵਕ ਸੰਚਾਲਨ ਲਈ ਡਾ. ਬੂਟਾ ਸਿੰਘ ਸੇਖੋਂ ਦੁਆਰਾ ਭੁਪਿੰਦਰ ਕੌਰ ਡੀਈਓ (ਸੈ.ਸਿ.) ,ਡਾ.ਪਰਮਜੀਤ ਸਿੰਘ  ਡਿਪਟੀ ਡੀਈਓ (ਸੈ.ਸਿ.),ਮਦਨ ਲਾਲ ਕਟਾਰੀਆ ਡਿਪਟੀ ਡੀਈਓ. (ਐ.ਸਿ.),ਸਮੂਹ ਡਾਈਟ ਫੈਕਲਟੀ,ਸਮੂਹ ਬੀਐਨਓਜ਼,ਬੀਪੀਈਓਜ਼,ਅਸਿਸਟੈਂਟ ਬਲਾਕ ਕੋਆਰਡੀਨੇਟਰਜ਼,ਸਮੂਹ ਕਲਸਟਰ ਮੁਖੀਆਂ,ਸਮੂਹ ਸਕੂਲ ਮੁਖੀਆ ,ਸਰਵੇਅਰ ਅਧਿਆਪਕਾਂ ,ਵਲੰਟੀਅਰ ਟੀਚਰਾਂ ਅਤੇ ਸਿਖਿਆਰਥੀਆਂ ਦਾ ਧੰਨਵਾਦ ਕੀਤਾ ਗਿਆ । ਜ਼ਿਲੵਾ ਨਿਲਪ ਕੁਆਰਡੀਨੇਟਰ ਡਾ.ਕਰਨੈਲ ਬੈਰਾਗੀ ਨੇ ਕਿਹਾ ਕਿ ਸਮਾਜ ਦੀ ਬਿਹਤਰੀ ਲਈ ਅਜਿਹੇ ਪੋ੍ਜੈਕਟ ਭਵਿੱਖ ਵਿੱਚ ਜਾਰੀ ਰਹਿਣੇ ਚਾਹੀਦੇ ਹਨ ।ਨਿਲਪ ਦੇ ਸਟੇਟ ਕੋਆਰਡੀਨੇਟਰ ਸੁਰਿੰਦਰ ਕੁਮਾਰ ਨੇ ਇਸ ਇਮਤਿਹਾਨ ਦੇ ਸਫਲਤਾ ਪੂਰਵਕ ਸੰਚਾਲਨ ਲਈ ਜਿਲ੍ਹਾ ਮਾਨਸਾ ਦੀ ਸਮੁੱਚੀ ਟੀਮ ਨੂੰ ਵਧਾਈ ਦਿੱਤੀ।